اليشكي همه مو سياسي

اليشكي همه مو سياسي
اليازمن منكوس راسي
والله شيبنه رغــم زغر العمر **** كافي مو شفناهه نجمات الظهر
اليشكي همه مو سياسي
....................

ليــش سيف العنصريه **** مــشبك ارگاب الزلم
وكلــشي ممنوع بزمنه **** حتى ممنــوع الحلم
انه مــجروح وأعانــي **** وارد اعبر عن ظلم
ليش اسكت وانه صرخه **** وصرختي بعينك جرم
لا تكابر لا تكابر
انه عنوان المگابر
اعترف بيه جرح يسعر جمر **** كافي مو شفناهه نجمات الظهر
اليشكي همه مو سياسي
....................
انه مـــعــروف بهويتي **** ورايتي تـلوح السمه
كافـــي ضم السيف عني **** بعد مــــــا بيه دمه
مـــا شبعتو مـــن دمانه **** ولا صحيتو من العمه
احنه چتفنه ابونه **** ولـوله ابونه ملحمه
انشــد التاريخ عني
لو تسافر لو تصدلي
لا تفجرني غدر وي كل فجر **** كافي مو شفناهه نجمات الظهر
اليشكي همه مو سياسي
....................
ليش يتغير مـزاجك **** من اصيحن يــاعلي
وانته تاريــخــك يگلي **** حيدره اول ولي
افتح التاريــخ واقره **** لا تصد عينك الي
والله غيرتو العقيده **** وكل مسارات العلي
هذا واقع مني تسمع
ولكتاب الباري ارجع
تلگه بين احروفه مرسوم الطهر **** كافي مو شفناهه نجمات الظهر
اليشكي همه مو سياسي
....................

انه عندي اجروح تسعر **** ولازم اتشوف الشمس
حتى كل الناس تعرف **** تعرف اخبار الامس
من ظلع امنه وفدكه **** من فعل ذاك الشرس
المانوه الشيطان فعله **** ولا بگه الغيره درس
هذا جرحي وارد اكشفه
وكطع المستور جفه
الذبح امنه ابوكم بلا عذر **** كافي مو شفناهه نجمات الظهر
اليشكي همه مو سياسي
..........................
انه مو طبعي سياسي **** ولا احب هذا الدرب
انه مرهون بدمعتي **** لان محروك الگلب
على وگع بالغاضريه **** الشنت عليه الحرب
هذا عنواني وهويتي **** وانته تعرف عن قرب
دمعتي تشرح مصابي
وصارت ادواي وشرابي
على الذبيح الماشرب ماي النهر **** كافي مــو شفناهه نجمات الظهر
اليشكي همه مو سياسي
..........................
امعسكره ازلمك عليه **** بين تفجير وذبح
ما نشف ريج الخناجر **** مو طلع فجر الصبح
بعد ما بينه نصافح **** الجرح خضر جرح
كافي مو غصيت بالدم **** والحزن شـيد صرح
يل عبرت اخطوط حمره
كافي مو چفيني ثوره
احذر الفارس اذ راد المهر **** كافي مو شفناهه نجمات الظهر
اليشكي همه مو سياسي
.........................
سـايريتك رغم جرحي **** وما ردت منك طبيب
ليش تسحك جرح دامي **** مـــن تجندلي الغريب
وانه مـــا يوم السألتك **** انته مسلم لو صليب
كافي يغراب المـصيبه **** كافي مو امرك عجيب
ما نفع وياك كلشي
اسكت وماريد تحچي
رغم طيبي وانته تحفرلي الكبر **** كافي مو شفناهه نجمات الظهر
اليشكي همه مو سياسي
..........................
الشاعر ابو سجاد الركابي الشطري