رجعت من اليسر خويه اشتكيلك ***من نار الكلب خويه اشتكيلك
***************************************
رجعت من اليسر خويه ***اجيت ابشوكي اشكيلك
مصايب بأليسر شفنه **هاك اسمع اشجره احجيلك
دخلنه الشام عدهم عيد**خوارج كالوا اعلينه
بدفوف وطبل يحسين**كلهه اتشمتت بينه
وسياط ابن سفيان *عل المتن تلعب
مارحموا الرضعان *ما خافوا الرب
جيت اشتكيلك ***جيت اشتكيلك
****************************************************
بخريب الشام خلوني **يخويه اشحالي تتصور
لاحر لابرد تنفع**يخويه اطفال تمرمر
اصرخ ياعلي وينك **تعاين ذبحو احسينك
وهاي الرووس فوك الزان **لعيالك واهل بيتك
اطفال مفجوعين **محد رحمهم
كفار متوحشين **لاذمه عدهم
جيت اشتكيلك ***جيت اشتكيلك
********************************************
من فزت رقيه اشلون**يحسين افجعت كلبي
كالتلي ابوي احسين**اريدنه او حجي عندي
اريد اشكيله الامي **يعمه وشتكي همي
من ضيم الجره اعليه **أظن ابوي مايدري
من جابوا الراس* للطفله رقيه
منهه انكطع الانفاس *جتهه المنيه
جيت اشتكيلك **جيت اشتكيلك
**************************************
تعنت للرضيع* اتكله ياعمه
ذكرتك من كربت**الماي اشربنه
اهيس نار بظلوعي **اوجرن منه
وبفكدك ابد **لاطاب ولا تهنه
ذكرت رضيع احسين *من شربت الماي
نار وشبت بالروح *وتمرد اجلاى
جيت اشتكيلك **جيت اشتكيلك
************************************
تعنت يم علي الاكبر **تون وتنوح
مفجوعة كلب **تشبه حمام الدوح
من عدهه الدمع سايل **نهر مسفوح
انخمدت علكبر**لاظل نفس لاروح
تعنت الاكبر *تشكي ألمها
لاظل نفس لا روح **تشكيله همها
جيت اشتكيلك **جيت اشتكيلك
*****************************************
تعنت جاسم وتصرخ **عزيز الروح
يعريس الطفوف **البلعرس مذبوح
بعدك لاتهنه *ولا ابطل النوح
بفراكك يجسام الكلب *مذبوح
وصلت الجاسم تشكي ألمها
تلطم عله الخدين *زايد ولمها
جيت اشتكيلك **جيت ِتكيلك
*********************************************************
وصلت للكفيل* او تسجب العبره
تكله يالجبتنه *ونمت عل الغبره
بعد عيناك *ماواحد عرف بأمره
صغار كبار مربوطين* والشمر اليحدينه
ها *خويه يبو النوماس ردناك اتحامينه
وكفت يم عباس *تشكيله همها
من ظلم هاي الناس* والجره منها
جيت اشتكيلك *** جيت اشتكيلك
ونسألكم الدعاء
رياض المالكي