بسمه تعالى
سلام عليكم سيد
يلا استلم
طريقة هذا الغريب امنين
--
--
بطوس الرضا ينعاك -- يوليدي الله اوياك
يبني الجواد اتروح -- مثلي الجبد مجروح
يوليدي الله اوياك
-----
من چبد بالسم تگطع من غريب امفارگ أبنه
أمن الرضا لأبنه الجواد الرايد ابلهفه يحظنه
والألم من سم دليله بدمعة اعيونه يسكنّه
هوه هم مثله غريب ويدري هاي الغربه محنه
ياغربة الاوطان -- شتعذب الانسان
ايظل بس جسد لاروح -- مثلي الجبد مجروح
يوليدي الله اوياك
--
والغريب الفارگ اهله وكل أخوته وكل عمامه
بالكدر حاله يعيشه ولا يحس لحظه بسلامه
والنهار ابعينه مظلم بليله لايهنه ومنامه
يبقه گلبه ايرف محّنه للاهل شوگه وغرامه
واليفگد المحبوب -- كل ساعه گلبه ايذوب
بگلبه نزيف أجروح -- مثلي الجبد مجروح
يوليدي الله اوياك
--
عا لرضا قبل الجواد وقبله عالكاظم مصيبه
أتغربوا تركوا وطنهم كل محب فارگ حبيبه
مارحم بيهم قدرهم كل چبد يسعر لهيبه
والذي يختم حياته اجنازته تصبح غريبه
الكاظم سجن وقيود -- لهله النعش ميعود
ظل عالجسر مطروح -- مثلي الجبد مجروح
يوليدي الله اوياك
---
امصيبه فوگ امصيبه مرت عالهواشم مامثلها
فاطمه المعصومه ظلت بالغرب لا يم اهلها
وزينب العاشت غريبه دمعه عالدمعه تهلها
لو رقيه وراس ابوها عگبه تسلم مامهلها
لو بالبقيع اكبور -- محرومه حتى النور
أچبود ودمع مسفوح -- مثلي الجبد مجروح
يوليدي الله اوياك
--
ياجواد الامه أنته للمراد اكبر وسيله
انته باب الرحمه انته أنته للتايه دليله
والطلب منك طلبته اتفرّحه اتبّرد غليله
عدنه طلبه وردنه منك اتشافي ارواح العليله
يالتكرم الوفاد -- منك نريد امراد
الغيرك ابد منروح -- مثلي الجبد مجروح
يوليدي الله اوياك
---
انتو باب الرحمه ربكم عالبشر انزل رحمته
بيكم الباري رحمنه وتتم اعلينه نعمته
والذي يذرف لجلكم دمعه تشفعله دمعته
شمعه وبكبره تضوي وعينه مسروره بوحشته
انجدد عهد هاليوم -- نخدمكم انظل دوم
والشارك ابهل النوح -- مثلي الدمع مسفوح
يوليدي الله اوياك سيد عدنان الحمامي